कला तथा हस्तलेखन प्रतियोगिता सम्पन्न, ४०० भन्दा बढी विद्यार्थीको सहभागिता

जगत राई शुक्रबार, पुस ४, २०८२ ।  निजी तथा आवासीय विद्यालय अर्गनाइजेसन नेपाल (प्याब्सन) पर्साको आयोजनामा शुक्रबार अन्तर–विद्यालय आर्ट एन्ड ह्...

जगत राई

शुक्रबार, पुस ४, २०८२ । 

निजी तथा आवासीय विद्यालय अर्गनाइजेसन नेपाल (प्याब्सन) पर्साको आयोजनामा शुक्रबार अन्तर–विद्यालय आर्ट एन्ड ह्यान्डराइटिङ (कला तथा हस्तलेखन) प्रतियोगिता भव्य रूपमा सम्पन्न भएको छ। विद्यार्थीहरूमा सृजनात्मक सोच, कलात्मक क्षमता र राम्रो हस्तलेखनको महत्त्व अभिवृद्धि गर्ने उद्देश्यले आयोजना गरिएको उक्त प्रतियोगितामा पर्सा जिल्लाका प्याब्सनसँग आबद्ध ३५ वटा विद्यालयका ४०० भन्दा बढी विद्यार्थीहरूको सहभागिता रहेको थियो।

वीरगञ्जस्थित राणीसती मन्दिर धर्मशालामा सम्पन्न प्रतियोगिताबारे जानकारी दिँदै प्याब्सन पर्साका सचिव अशोक सङ्ग्रौलाले शैक्षिक पाठ्यक्रमसँगै अतिरिक्त क्रियाकलापको माध्यमबाट विद्यार्थीहरूको सर्वाङ्गीण विकासमा सहयोग पुर्‍याउने लक्ष्यका साथ कार्यक्रम आयोजना गरिएको बताउनुभयो। उहाँका अनुसार कलात्मक अभिव्यक्ति र सफा, सुन्दर हस्तलेखनले विद्यार्थीको व्यक्तित्व विकासमा महत्वपूर्ण भूमिका खेल्ने भएकाले यस्तो प्रतियोगितालाई नियमित बनाउने योजना छ। सचिव सङ्ग्रौलाले भन्नुभयो, "आजको डिजिटल प्रविधिको युगमा टाइपिङ र प्रविधिमै बढी निर्भरता बढ्दै गएको छ, तर राम्रो हस्तलेखनको आफ्नै पहिचान र मूल्य छ। यसले विद्यार्थीको एकाग्रता, धैर्यता र सृजनात्मक क्षमतालाई मजबुत बनाउँछ। यस प्रतियोगिताले विद्यार्थीभित्र लुकेको कला र प्रतिभालाई उजागर गर्ने अवसर दिएको छ।"

प्रतियोगिताको सम्पूर्ण व्यवस्थापन तथा समन्वयको जिम्मेवारी प्याब्सन पर्साका वरिष्ठ सदस्य तथा मुनलाइट स्कुलका संस्थापक सुशील केसीलाई दिइएको थियो। केसीका अनुसार प्रतियोगिता व्यवस्थित र प्रतिस्पर्धात्मक बनाउन समूहगत ढाँचामा सञ्चालन गरिएको थियो।आर्ट प्रतियोगितातर्फ नर्सरीदेखि कक्षा १२ सम्मका विद्यार्थीहरूलाई ६ वटा समूहमा विभाजन गरी प्रतिस्पर्धा गराइएको थियो भने ह्यान्डराइटिङतर्फ कक्षा १ देखि १० सम्मका विद्यार्थीहरूलाई ४ वटा समूहमा राखिएको थियो। यसले उमेर र कक्षाअनुसार विद्यार्थीको क्षमतालाई निष्पक्ष रूपमा मूल्याङ्कन गर्न सहज भएको आयोजकको भनाइ छ।

प्रतियोगिताको मूल्याङ्कन पूर्ण रूपमा निष्पक्ष र तटस्थ बनाउन काठमाडौँबाट विशेष निर्णायक मण्डल बोलाइएको थियो। निर्णायकहरूले कलात्मक प्रस्तुति, रचनात्मकता, विषयवस्तुको स्पष्टता, रंग संयोजन, सफाइ र हस्तलेखनको सुन्दरतालाई आधार मानेर मूल्याङ्कन गरेका थिए। प्रतियोगितामा उत्कृष्ट प्रदर्शन गर्ने विद्यार्थी तथा समूहलाई मेडल, शिल्ड, प्रमाणपत्रलगायत विभिन्न आकर्षक पुरस्कार प्रदान गरिएको छ। कार्यक्रममा सहभागी विद्यालयका शिक्षक तथा अभिभावकहरूले पनि प्रतियोगिताको खुलेर प्रशंसा गरेका छन्। उनीहरूको भनाइमा यस्ता अतिरिक्त क्रियाकलापले विद्यार्थीको आत्मविश्वास बढाउनुका साथै विद्यालयहरूबीच स्वस्थ प्रतिस्पर्धाको वातावरण सिर्जना गर्छ। साथै, विद्यार्थीहरू पढाइसँगै सिर्जनशील गतिविधितर्फ आकर्षित हुने अवसर पाउँछन्।

आयोजकका अनुसार यस प्रकारका प्रतियोगिताले पर्सा जिल्लाका निजी विद्यालयहरूबीच आपसी सहकार्य र सकारात्मक प्रतिस्पर्धालाई प्रवर्द्धन गर्नुका साथै विद्यार्थीहरूको बौद्धिक, मानसिक र सृजनात्मक विकासमा महत्वपूर्ण योगदान पुर्‍याउने विश्वास लिइएको छ। प्याब्सन पर्साले आगामी दिनमा पनि यस्ता शैक्षिक तथा सिर्जनात्मक कार्यक्रमहरूलाई निरन्तरता दिने जनाएको छ। निजी तथा आवासीय विद्यालय अर्गनाइजेसन नेपाल ९प्याब्सन० पर्साका अध्यक्षय सरोज प्रसाद चौधरीको अध्यक्ष्यता तथा जिल्ला शिक्षा समन्वय समिती इकाइ प्रमुख मोती राम भट्को प्रमुख आतिथ्यमा प्रतियोगीता सम्पन्न भएको हो । कार्यक्रममा शिक्षा महाशाखा प्रमुख आन्नद लामिक्षाने, प्याबसन महानगर अध्यक्षय राहुल श्रीवास्तव, हिसान उपाध्यक्षय आलोक चौरसिया एवम् प्याबसनका केन्द्रिय पदाधिकारीहरुको उपस्थिती रहेको थियो ।