सर्बोच्च अदालतले जाफर र मंजरुलहकलाई लिखित जवाफ पेश गर्न आदेश दिएको छ
वीरगंज । राष्ट्रिय सम्पदा तथा सार्वजनिक सम्पति संरक्षण मञ्च पर्साका अध्यक्ष ७३ वर्षीय जाफर अन्सारी र महासचिव ६३ वर्षीय मंजरुलहक मियाँ विरुद्ध दायर अदालतको अवहेलना मुद्दामा सर्वोच्च अदालतले लिखित जवाफ पेश गर्न आदेश दिएको छ ।
गत वैशाख ३० गते अधिवक्ता प्रभाकर मण्डलले दायर गरेको मुद्दा नम्बर ०८२ एपी ०६४१ मा सर्वोच्च अदालतका न्यायाधीशद्वय महेश शर्मा पौडेल र शान्ति सिंह थापाको संयुक्त इजलासले पत्र प्राप्त भएको मितिले सात दिनभित्र लिखित जवाफ पेश गर्न आदेश गरेको हो ।
सर्वोच्च अदालतले जेठ ४ गते जारी गरेको आदेशमा प्रेस विज्ञप्ति प्रकाशन तथा प्रसारणमार्फत अदालतको मर्यादा, निष्पक्षता र न्याय प्रशासनमा प्रतिकूल असर पर्ने कार्य गरिएको भन्दै अदालतको अवहेलना कारबाहीको माग गरिएको उल्लेख छ ।
आदेशमा “निवेदकको मागबमोजिम आदेश किन जारी हुनु नपर्ने हो ? आदेश जारी हुनु नपर्ने भए सोको आधार र कारणसहित बाटोको म्याद बाहेक सूचना प्राप्त भएको सात दिनभित्र आफैं वा कानुनबमोजिमको प्रतिनिधिमार्फत लिखित जवाफ पेश गर्नू” भनिएको छ ।
उक्त विवाद नेशनल मेडिकल कलेज सम्बन्धी पुरानो कानुनी विवादसँग जोडिएको छ । सर्वोच्च अदालतमा २०५६ सालमा दायर उत्प्रेषणयुक्त प्रतिषेध रिटमा नेशनल मेडिकल प्रालिले शिक्षा मन्त्रालय तथा उच्च प्राविधिक शिक्षा तथा अनुमति समितिबाट प्राप्त गरेको अनुमति सम्बन्धी विषय उठाइएको थियो ।
मुद्दाअनुसार नेपाल मुस्लिम वेलफेयर सोसाइटीले उपलब्ध गराएको मनसायपत्रको अनधिकृत प्रयोग गरी नेशनल मेडिकल कलेज प्रालि दर्ता गरिएको दाबी गर्दै संस्थामा आफ्नो हक पुनःस्थापना गर्न माग गरिएको थियो ।
तर सर्वोच्च अदालतबाट नेपाल मुस्लिम वेलफेयर सोसाइटीको पक्षमा फैसला नभएपछि काठमाडौं जिल्ला अदालतमा दायर जालसाजी मुद्दामा पनि वादीको दाबी नपुग्ने फैसला भएको उल्लेख गरिएको छ । उक्त फैसला पुनरावेदन अदालत हुँदै सर्वोच्च अदालतसम्म पुगे पनि निवेदनको निस्सा नपाएको र अन्ततः अदालतको फैसला विपक्षीकै पक्षमा रहेको मुद्दामा जनाइएको छ ।
COMMENTS