सांस्कृतिक सम्पदा तथा पर्यटनको पहिचान बोकेको ऐतिहासिक सूर्य मन्दिरको जीर्णोद्धार तथा सौन्दर्यीकरण कार्यले अब नयाँ गति पाउने भएको छ।

 रक्सौलस्थित धार्मिक आस्था, सांस्कृतिक सम्पदा तथा पर्यटनको पहिचान बनेको ऐतिहासिक सूर्य मन्दिरको जीर्णोद्धार तथा सौन्दर्यीकरण कार्यले अब नयाँ...

 रक्सौलस्थित धार्मिक आस्था, सांस्कृतिक सम्पदा तथा पर्यटनको पहिचान बनेको ऐतिहासिक सूर्य मन्दिरको जीर्णोद्धार तथा सौन्दर्यीकरण कार्यले अब नयाँ गति पाउने भएको छ। यस सम्बन्धमा सोमबार रक्सौल थाना परिसरमा सूर्य मन्दिर समितिको महत्वपूर्ण बैठक सम्पन्न भएको हो। समितिका पदेन अध्यक्ष तथा स्थानीय विधायक प्रमोद कुमार सिन्हा को अध्यक्षतामा सम्पन्न बैठकमा मन्दिर परिसरको समग्र विकास, पोखरीको सरसफाइ, सौन्दर्यीकरण तथा यसलाई धार्मिक एवं पर्यटकीय आकर्षणको प्रमुख केन्द्रका रूपमा विकास गर्ने विषयमा विस्तृत छलफल गरिएको थियो।बैठकलाई सम्बोधन गर्दै विधायक प्रमोद कुमार सिन्हाले सूर्य मन्दिर केवल धार्मिक स्थल मात्र नभई रक्सौलको सांस्कृतिक पहिचान र जनआस्थाको केन्द्र रहेको बताए। उनले ऐतिहासिक सम्पदाको संरक्षण गर्नु सबैको साझा दायित्व भएको उल्लेख गर्दै मन्दिरको जीर्णोद्धार तथा सौन्दर्यीकरणका लागि दीर्घकालीन तथा प्रभावकारी कार्ययोजना बनाई कार्यलाई शीघ्र अघि बढाइने जानकारी दिए।

उनले आगामी दिनमा सूर्य मन्दिरलाई धार्मिक पर्यटनको नक्सामा विशेष पहिचान दिलाउन हरसम्भव प्रयास गरिने बताउँदै देश–विदेशबाट आउने श्रद्धालु तथा पर्यटकलाई यहाँको आध्यात्मिक र सांस्कृतिक गरिमासँग जोड्ने लक्ष्य रहेको स्पष्ट पारे।

बैठकमा सहभागी रिपूराज मिल एग्रो प्रा. लि.का निर्देशक रामेश्वर गुप्ता ले विधायकको सिफारिसमा आफ्नो पूर्वघोषणालाई दोहोर्‍याउँदै सूर्य मन्दिरको जीर्णोद्धार तथा सौन्दर्यीकरणमा लाग्ने सम्पूर्ण खर्च रिपूराज मिल व्यवस्थापनले व्यहोर्ने घोषणा गरे। उनले यो कार्य सामाजिक दायित्वसँगै धार्मिक आस्थासँग जोडिएको पुण्य कार्य भएको बताए।

बैठकपछि विधायक प्रमोद कुमार सिन्हा, एसडीएम मनीष कुमार, रक्सौल थानाध्यक्ष आईपीएस हेमन्त सिंह तथा समितिका सदस्यहरूले मन्दिर परिसरको स्थलगत निरीक्षण गरेका थिए। निरीक्षणका क्रममा रिपूराज एग्रो प्रा. लि.द्वारा प्रस्तावित जीर्णोद्धार तथा सौन्दर्यीकरण योजनाबारे गहन छलफल गरिएको थियो।

यस क्रममा विधायक सिन्हाले नगर परिषद् रक्सौलद्वारा मन्दिर पोखरीमा भइरहेको सरसफाइ कार्यको पनि अवलोकन गर्दै सम्बन्धित अधिकारीहरूलाई आवश्यक निर्देशन दिएका थिए।

समितिका मिडिया प्रभारी रजनीश प्रियदर्शी ले मन्दिरको विकासका लागि जनसहभागिता तथा प्रशासनिक सहकार्यबाट छिट्टै सकारात्मक पहलहरू देखिने बताए।

बैठकमा समितिका सचिव शम्भु प्रसाद चौरसिया, कोषाध्यक्ष गणेश अग्रवाल, राकेश कुशवाहा, अरुण कुमार गुप्ता, दिनेश धानोठिया, गुड्डू खेतान, पप्पू कुमार गिरि, कमलेश कुमार, अजय पटेल, मृत्युंजय सिंहलगायत समितिका अन्य सदस्यहरूको उपस्थिति रहेको थियो।