नेपाल टेलिभिजनले विभिन्न समयमा गरेका उपकरण तथा प्रविधि खरिद प्रक्रियाको छानबिन समिति गठन

सूचना तथा सञ्चार मन्त्रालयले सार्वजनिक सेवा प्रसारण संस्था नेपाल टेलिभिजनले विभिन्न समयमा गरेका उपकरण तथा प्रविधि खरिद प्रक्रियाको अध्ययन एव...

सूचना तथा सञ्चार मन्त्रालयले सार्वजनिक सेवा प्रसारण संस्था नेपाल टेलिभिजनले विभिन्न समयमा गरेका उपकरण तथा प्रविधि खरिद प्रक्रियाको अध्ययन एवं छानबिन गर्न चार सदस्यीय समिति गठन गरेको छ। मन्त्रालयका अनुसार २०८३ असार १ गतेको मन्त्रीस्तरीय निर्णयबाट डा. सुदीप भट्टराईको संयोजकत्वमा उक्त छानबिन समिति गठन गरिएको हो।

समितिलाई नेपाल टेलिभिजनले खरिद गरेका विभिन्न उपकरण, सफ्टवेयर तथा डिजिटल प्रणालीसँग सम्बन्धित उजुरी, प्रतिवेदन र सार्वजनिक सरोकारका विषयहरूको तथ्यपरक अध्ययन गरी २१ दिनभित्र सुझावसहितको प्रतिवेदन मन्त्रालयमा पेस गर्न कार्यादेश दिइएको छ।

विशेष गरी नेपाल टेलिभिजनद्वारा विभिन्न समयमा खरिद गरिएका ग्राफिक्स सिस्टम, न्यु मिडिया (डिजिटल प्लेटफर्म) सेवा, अडियो/भिडियो उपकरण, डिजिटल ट्रान्समिटर तथा इटहरी च्यानलका लागि खरिद गरिएको ‘प्लेआउट अटोमेसन सिस्टम’ का सम्बन्धमा विस्तृत अध्ययन गर्ने जिम्मेवारी समितिलाई तोकिएको छ। यी खरिद प्रक्रियाहरूका विषयमा विभिन्न निकायमा गुनासो तथा उजुरीहरू परेपछि मन्त्रालयले आफ्नो आन्तरिक जानकारी प्रयोजनका लागि यो कदम चालेको हो।

नेपाल टेलिभिजनमा विगत केही वर्षयता प्रविधि तथा प्रसारण प्रणाली आधुनिकीकरणका नाममा भएका विभिन्न खरिद प्रक्रियाहरूमा पारदर्शिता र कानुनी प्रक्रियाको पालना नभएको भन्दै प्रश्नहरू उठ्दै आएका छन्। यसअघि पनि मन्त्रालयले नेपाल टेलिभिजनको स्याटेलाइट खरिद प्रकरणबारे छानबिन गर्न अर्को समिति गठन गरेको थियो।