वीरगञ्ज-
बाँकी रहेको तलबको माग गर्दै वीरगञ्ज महानगरपालिकाका कर्मचारीहरूले आज बिहानैदेखि सुरु गरेको आन्दोलन कार्यवाहक नगर प्रमुख इम्तियाज आलमको कुशल मध्यस्थता र सक्रियताका कारण अन्ततः स्थगित भएको छ। महानगरको सेवा नै ठप्प पार्ने गरी सुरु भएको विरोध कार्यक्रम कार्यवाहक प्रमुख आलम, प्रमुख प्रशासकीय अधिकृत र आन्दोलनकारी कर्मचारीहरूबीच भएको त्रिपक्षीय संवादपछि टुङ्गिएको हो। सहमति भएसँगै कर्मचारीहरू काममा फर्किएका छन् र महानगरका सम्पूर्ण कामकारबाहीहरू नियमित रूपमा सुचारु भएका छन्।
आज दिउँसो स्थानीय निकाय कर्मचारी संघ (एमाले) समर्थक महानगर एकाइ कमिटीका अध्यक्ष मुकेश गुप्ताको नेतृत्वमा केही कर्मचारीहरूले जेठ र असार महिनाको तलब तत्काल पाउनुपर्ने माग राख्दै वीरगञ्ज महानगरको दैनिक कार्यसम्पादन अवरुद्ध पारेका थिए। महानगरजस्तो जनतासँग प्रत्यक्ष जोडिएको संवेदनशील निकायमा बिनाकुनै पूर्वसूचना, पद्धति र सिद्धान्तको पालना नै नगरी एकाएक नारा-जुलुस गरिनु दुःखद र खेदजनक रहेको सरोकारवालाहरू बताउँछन्।
यस आकस्मिक आन्दोलनप्रति कार्यवाहक प्रमुख इम्तियाज आलमले कडा आपत्ति जनाउँदै यसलाई "अशोभनीय र कतैबाट परिचालित" भएको हुन सक्ने गम्भीर आशंका व्यक्त गर्नुभएको छ। आफूले कर्मचारीहरूलाई पहिले नै तलब निकासा गरिदिने स्पष्ट आश्वासन दिइसकेको अवस्थामा पनि पुनः त्यही विषयलाई उछालेर आन्दोलन खडा गरिनुले यसको पछाडि राजनीतिक दाउपेच लुकेको हुन सक्ने संकेत उहाँले गर्नुभयो। लोकतान्त्रिक पद्धतिमा आन्दोलन र माग राख्ने अधिकार सबैलाई भए पनि त्यसको न्यूनतम प्रक्रिया समेत पूरा नगरी जनतालाई सास्ती दिनु न्यायसङ्गत नहुने आलमको भनाइ छ।
वास्तवमा, वीरगञ्ज महानगरपालिकामा कर्मचारीको तलब रोकिनुमा विगतको नेतृत्वको चरम लापर्बाही र प्रशासनिक बेथिति जिम्मेवार रहेको देखिन्छ। निलम्बित मेयर राजेशमान सिंहको कार्यकालमा स्थायी कर्मचारीहरू ४ महिना र करारका कर्मचारीहरू ५ महिनासम्म तलबविहीन अवस्थामा रहेका थिए। सिंहको पालाको त्यो गम्भीर आर्थिक भद्रगोल र चरम उदासीनतालाई कार्यवाहक प्रमुखको जिम्मेवारी सम्हाल्ने बित्तिकै इम्तियाज आलमले द्रुत गतिमा समाधानतर्फ लैजानुभएको हो। उहाँले जिम्मेवारी सम्हाले लगतै स्थायी कर्मचारीहरूको ३ महिनाको र करारका कर्मचारीहरूको ४ महिनाको लामो समयदेखि रोकिएको बक्यौता तलब यहि महिनामा निकासा गरेर कर्मचारीहरूलाई ठुलो राहत प्रदान गर्नुभएको थियो।
विगतको लामो समयको आर्थिक संकटलाई जादुमयी शैलीमा समाधान गरेर कर्मचारीको मन जितेका आलम विरुद्ध जेठ र असार महिनाको मात्रै तलब बाँकी रहँदा आन्दोलनको वातावरण बनाइनु आफैमा अर्थपूर्ण देखिन्छ। यद्यपि, आन्दोलन सुरु भएलगत्तै कार्यवाहक प्रमुख आलम र प्रमुख प्रशासकीय अधिकृत वसन्त बहादुर बोहराले देखाएको जिम्मेवार तत्परताका कारण स्थिति तत्काल नियन्त्रणमा आएको हो।
महानगरमा बुद्दिमानीपूर्ण ढङ्गले चालिएको वार्ताका क्रममा हाललाई १ महिना (अर्थात जेठ महिना) को तलब तुरुन्त पठाउने व्यावहारिक सहमति जुटेको छ। यो सहमतिसँगै एमाले समर्थक कर्मचारी संघका अध्यक्ष मुकेश गुप्ता लगायतका आन्दोलनकारीहरू आफ्नो अडानबाट पछि हट्दै विरोधका कार्यक्रम स्थगित गर्न तयार भएका हुन्। विगतको नेतृत्वले सिर्जना गरेको चरम आर्थिक र प्रशासनिक अस्तव्यस्ततालाई कुशलतापूर्वक व्यवस्थापन गर्दै कर्मचारीलाई न्याय र वीरगञ्जबासीलाई निर्वाध सेवा दिन कार्यवाहक प्रमुख इम्तियाज आलमले प्रदर्शन गरेको यो दृढता र संकट व्यवस्थापन क्षमताको यतिबेला चौतर्फी प्रशंसा भइरहेको छ। उहाँको यो परिपक्व कदमले वीरगञ्ज महानगरमा उनको बलियो र कडा 'कमाण्ड' लाई पुनः साबित गरिदिएको छ।
COMMENTS