पर्सा जिल्लाको पर्सागढी नगरपालिका–७ चैनपुर निवासी २९ वर्षीय राकेश कुमार पटेलको पार्थिव शरीर करिब तीन महिनापछि शुक्रबार राति अस्ट्रेलियाबाट नेपाल ल्याइएको छ। कानुनी तथा प्रशासनिक प्रक्रिया पूरा गर्न समय लागेका कारण ढिलाइ भए पनि अन्ततः उनको शव स्वदेश आइपुगेको हो।
रोजगारीका लागि अस्ट्रेलिया पुगेका पटेल गत चैत २० गते ताज्मानियास्थित आफ्नै निवासमा मृत अवस्थामा फेला परेका थिए। उनको मृत्युको कारणबारे हालसम्म आधिकारिक रूपमा विस्तृत विवरण सार्वजनिक गरिएको छैन। घटनापछि अस्ट्रेलियास्थित नेपाली दूतावासले परिवारलाई जानकारी गराएको थियो।
छोराको पार्थिव शरीर स्वदेश ल्याइदिन माग गर्दै उनका पिता ब्रिजा राउत कुर्मीले २०८३ वैशाख २३ गते परराष्ट्र मन्त्रालयमा निवेदन दिएका थिए। लामो समयसम्म प्रक्रिया अघि नबढेपछि परिवारले सम्बन्धित निकायसँग निरन्तर पहल गर्दै आएको थियो।
यसैबीच, पर्सा निर्वाचन क्षेत्र नम्बर–२ का प्रतिनिधिसभा सदस्य सुशील कुमार कानुले असार १८ गते प्रतिनिधिसभा बैठकमा उक्त विषय उठाउँदै विदेशमा मृत्यु भएका नेपाली नागरिकको पार्थिव शरीर सम्मानपूर्वक स्वदेश ल्याउन सरकारले आवश्यक समन्वय र पहल गर्नुपर्ने माग गरेका थिए।
सांसद कानुले संसदमा विषय उठाएपछि परराष्ट्र मन्त्रालयले सम्बन्धित निकायसँग समन्वयलाई तीव्र बनाएको थियो। अस्ट्रेलियामा रहेका नेपाली समुदायले समेत आवश्यक परे आर्थिक सहयोग संकलन गरी शव स्वदेश पठाउने तयारी गरेका थिए। त्यसपछि पार्थिव शरीर नेपाल ल्याउने प्रक्रिया द्रुत गतिमा अघि बढेको थियो।
शुक्रबार राति काठमाडौँ आइपुगेको पार्थिव शरीर परिवारजनले बुझिसकेका छन्। त्यसपछि अन्तिम श्रद्धाञ्जलीका लागि शव पर्सागढी नगरपालिका–७ चैनपुरस्थित निवासतर्फ लगिएको छ। परिवारका अनुसार शनिबार चैनपुरमै अन्तिम श्रद्धाञ्जली अर्पण तथा अन्त्येष्टि गरिनेछ।
करिब तीन महिनादेखि अन्तिम दर्शनको प्रतीक्षामा रहेका परिवारका लागि पार्थिव शरीर स्वदेश आइपुग्नु अत्यन्त भावुक क्षण बनेको छ। शव स्वदेश ल्याउने प्रक्रियामा सहयोग पुर्याउने नेपाल सरकार, अस्ट्रेलियास्थित नेपाली दूतावास, सांसद सुशील कुमार कानु, अस्ट्रेलियामा रहेका नेपाली समुदाय तथा सहयोग गर्ने सम्पूर्ण व्यक्ति र निकायप्रति परिवारले आभार व्यक्त गरेको छ।
COMMENTS