बाल दिवसको अवसरमा श्री जिल्ला उचाङ्गल राष्ट्रिय माध्यमिक विद्यालयका विद्यार्थीहरू संग वक्तृत्वकला प्रतियोगिता सम्पन्न
पोखरिया, पर्सा । बाल दिवसको अवसरमा एनसीई नेपाल जिल्ला समिति पर्साको आयोजनामा पर्साको पोखरियास्थित श्री जिल्ला उचाङ्गल राष्ट्रिय माध्यमिक विद्यालयमा वक्तृत्वकला प्रतियोगिता सम्पन्न भएको छ।
विद्यालयका प्रधानाध्यापक राजकुमार शाहको अध्यक्षतामा सम्पन्न प्रतियोगितामा कक्षा ८ र ९ मा अध्ययनरत बालबालिकाहरूको सहभागिता रहेको थियो। प्रतियोगितामा सहभागी विद्यार्थीहरूले बालबालिकाको अधिकार, बालअधिकारको संरक्षण तथा बालबालिकामाथि हुने हिंसा न्यूनीकरण गर्न अपनाउनुपर्ने उपायलगायतका विषयमा आफ्ना विचार प्रस्तुत गरेका थिए।
कार्यक्रममा पोखरिया नगरपालिकाको शिक्षा शाखाका ललन पटेलले बालबालिकाको अधिकार सुनिश्चित गर्नुका साथै उनीहरूमाथि हुने विभिन्न प्रकारका हिंसा न्यूनीकरणका लागि विद्यालय, अभिभावक, स्थानीय सरकार तथा सम्बन्धित सबै पक्षको महत्वपूर्ण भूमिका रहने बताउनुभयो।
उहाँले बालबालिकालाई आफ्ना अधिकार र कर्तव्यबारे सचेत गराउँदै सुरक्षित, सम्मानजनक र बालमैत्री वातावरण निर्माण गर्नुपर्नेमा जोड दिनुभयो।
प्रतियोगिताले बालबालिकामा आफ्ना विचार स्पष्ट रूपमा प्रस्तुत गर्ने क्षमता विकास गर्नुका साथै बालअधिकार र हिंसा न्यूनीकरणसम्बन्धी सचेतना अभिवृद्धि गर्न सहयोग पुगेको आयोजकले जनाएको छ। कार्यक्रमका सहभागी विद्यार्थीहरूले बालबालिकाका सवालमा खुलेर आफ्ना धारणा राख्ने अवसर पाएकोमा खुशी व्यक्त गरेका थिए।
COMMENTS