हिसान पर्साद्वारा दशैँ, तिहार तथा छठ पर्वको शुभकामना आदानप्रदान कार्यक्रम सम्पन्न
वीरगञ्ज। उच्च शिक्षालय तथा माध्यमिक विद्यालय संघ नेपाल (हिसान) पर्साको आयोजनामा हिन्दू धर्मावलम्बीहरूको महान् पर्व विजयादशमी, दीपावली तथा छठ पर्वको अवसरमा शुभकामना आदानप्रदान कार्यक्रम सम्पन्न भएको छ।
हिसान पर्साका अध्यक्ष मुकेश गुप्ताको अध्यक्षता तथा मधेस विश्वविद्यालयका रजिस्ट्रार विजय कुमार यादवको प्रमुख आतिथ्यमा कार्यक्रम सम्पन्न भएको हो।
कार्यक्रममा सहभागीहरूले नेपाली समाजमा विशेष महत्त्व राख्ने दशैँ, तिहार तथा छठ पर्वले आपसी सद्भाव, एकता, भाइचारा र सामाजिक सहिष्णुतालाई थप मजबुत बनाउने विश्वास व्यक्त गरेका थिए। यस्ता पर्वहरूले परिवार, समाज र समुदायबीच आत्मीयता बढाउनुका साथै नेपाली मौलिक संस्कृति र परम्पराको संरक्षण तथा प्रवर्द्धनमा महत्त्वपूर्ण भूमिका खेल्ने धारणा व्यक्त गरिएको थियो।
कार्यक्रममा शिक्षा क्षेत्रसँग आबद्ध व्यक्तिहरूबीच आपसी सम्बन्ध सुदृढ बनाउँदै शैक्षिक विकास र सहकार्यलाई थप प्रभावकारी बनाउने विषयमा समेत जोड दिइएको थियो।
कार्यक्रमको अन्त्यमा सहभागीहरूले एकअर्कालाई विजयादशमी, दीपावली तथा छठ पर्वको शुभकामना व्यक्त गर्दै सबैको सुख, शान्ति, समृद्धि र उत्तरोत्तर प्रगतिको कामना गरेका थिए।
हिसान पर्साले आयोजना गरेको उक्त कार्यक्रमले शैक्षिक क्षेत्रका व्यक्तिहरूबीच आपसी सद्भाव र सहकार्य अभिवृद्धि गर्न सहयोग पुग्ने अपेक्षा गरिएको छ।
COMMENTS